KANDA KĨRORERWA

Kaĩ arĩ atĩa gũthiĩte
Ndĩrakuonire ndĩrakwĩrirĩria
O tũterete na ũũthekie
Ũnyumagarie na ũnyinĩre

Ndindĩkano ya kĩũndũ gĩkĩ
Nĩ ta mbombo ĩiyũire ngogoyo
Nĩ ta gĩthima kĩa maĩ me cama
Nĩ ta rwĩmbo rũtarĩ mũthia
Nĩ ta kĩĩruru werũinĩ

Ndeto ici atĩa?
Iraguthũra maũndũ ta rũheni
Ithaa rĩgatuĩka ndagĩka
Kĩanda gĩgatuĩka nyunjurĩ
Mũtũngi rita ũkahũtha ta karatathi

Reke ngũtemere
Ndakuonire ngoro ĩkĩrũga
Ndakinyũkia na mbere
Ngĩigua maitho makĩngucia
Ngingo na yo ĩkĩgonyoka
Ĩĩhũgũrage o mwena ũmwe

Kũri mũmbĩre na itherũ
Kũrĩ kwĩrora na mũciarĩre
Kanda kĩrorerwa na ma
Wĩ nyarari mũrũ wa ũthaka
Wĩhandaga ta anake a ita
Ũgakinyũkia ta mbogo ya gĩthemba
Gĩthũri tiga cimba ceraceera
Wororo wa iromo no ta ndunda njĩru
Maitho na mo me riri wa njata

Kĩhiũhahiũhe ũnginyĩre
Na watithia ngũcokere
Ngũinũkĩrie maitũ witũ
Na wamũthambĩria indo
Cũcũ egũkũihũrĩra wa mũkio
Akwĩre atĩ ndiũĩ kũruga
No tũngĩgeria hamwe
Ciakĩra nduge nĩ njorua ya ũrugi

Gwitũ ni rũgũrũ rwa mburoti
Na rami nĩ kũrĩ ndũkamake
Wakinya kwa mũthabiri ũrĩrĩrie
Ni ngwetereire ndũgatinde
Mwendwa

© Kanyua Hũngũ 2002 Wagio Wabera Rebo