THIGINO YA NGARANGO

Mũingĩ wang'ario thakame
Thigino yanunga ta ngarango
Yatararĩka camba ng’ima
Gĩcagi o na njĩrainĩ
Ĩ na ũrũrũ wa marakara
Yaimbia ngoro na mahũri
Yararakia maitho na ngothi
Riri wa ũmũndũ wanyuo
Andũ manyamarĩka

Ngũrora itherero maitho makorĩra
Nĩ ũirũ wa bũthi macambainĩ
Ma kahiũkĩri ciene
Ngaikia maitho rũgũrũ
Ngamakio nĩ mũhihinyano
Wa andũ icagiinĩ itarĩ huhĩrio
Gathũnu kamwe gatoga
Gĩcagi kĩgima gĩkaaga toro

Ngwĩcũrania ngĩenda kũmenya
Anja ya mwatũka ũyũ nĩ kĩĩ
wagayania marĩ na matarĩ
Mĩoyo ya marĩ yanyotoka
Ya matarĩ yagũthara
No ng’aragu nĩ njũru
Nĩ ĩtũmaga andũ aya erĩ matũngane

Huho ici ciombũrana ũũ nĩ kĩ
Ciagurumũra gĩcagi kĩgima
Kanini na kanene maguthũka na nja
Mang’ethera itherero ria macamba
Huho igĩterema gwa kahiũkĩri ciene
Thigino yanunga ta ũkĩ
Ngarango ciaikio na nja

© 2004 Wagio Wabera Rebo