Ũhoro wa Mũrebeti: Gatua wa Mbũgwa
  Click here for ENGLISH VERSION      Hihinya haha NDŨNYŨ ũgũre TN


Mũtaratara
Mũciĩ
Ndũnyũ ya TN
Ũhoro wa Mũrebeti
Marebeta
Njaranda
Ndaũri
Ũrĩa maroiga
Rũga
Twandĩkĩre


Ũhoro wa Mũrebeti
Gatua wa Mbũgwa athomagĩra Ph.D. ya Thayathi ya Ũkũria wa Tĩri na Mĩmera (Nguronomĩ) thĩiniĩ wa Yunibacĩtĩ ya Wyoming, U.S.A. Aanyitĩire ngathĩ (ndigirii) ya Mũramati wa Ũgĩ wa Mathomo ma Ũrĩmi wa Mabũrũri na Ũkũria wa Matũũra, M.P.S. (2001) na ngathĩ ya Mũramati wa Thayathi (MS) cia Tĩri na Mĩmera (2003) Yunibacĩtĩ ya Cornell, New York. Nĩ arĩ ngathĩ igĩrĩ cia Mũranja wa Ũturi (B.A.), ya Mathomo ma Macigĩrĩria na ya Ũteti (dual B.A. in Environmental Studies and Politics) iria aanyitĩire Yunibacĩtĩ ya California, Santa Cruz, (1997).

Mbere ya gũthiĩ mathomo USA mwaka wa 1992, Gatua aathomagĩra ũrĩmi wa Mbayotethibũ (Bio-intensive agriculture) thukuru ya Manor House Agricultural Centre, itũũra rĩa Kitale, Kenya, na nĩ aathomithagia ũrĩmi ũcio matũũrainĩ Gatũndũ.

Gatua wa Mbũgwa nĩ etĩkĩtie agwatĩirie atĩ andũ a Abirika nĩo mangĩhota kũmĩkũũra kuma mathĩĩnainĩ ma matukũ tũrĩ, na ũteithio wa kuma nja ya Abirika no gũteithĩrĩria ũngĩteithĩrĩria. Etĩkĩtie atĩ thiomi cia Abirika nĩ ũtonga wa kĩndũire ũtarĩ waciarithio, na nĩ cio gĩthima kĩa ũkũria wa Abirika, o ta ũrĩa thiomi cĩa Yurũbu arĩ cio ikũrĩtie mabũrũri ma Yurũbu na ma Amerika ya Rũgongo.

Gatua wa Mbũgwa nĩ andĩkaga ndungo na marebeta na rũthiomi rwake rwa kĩndũire rwa Gĩgĩkũyũ, na mandĩko make nĩ marutĩtwo nĩ Mũtiiri, Njaranda ya Mĩikarĩre.

Gatua aandĩkire Ugo wa Mũramati wa Thayathi (MS Thesis) wĩtagwo "Nditi ya Ũrĩmi wa Mbayotethibũ Kenya Kũrĩ Magetha ma Thũkũma na Maguni Thĩiniĩ wa Cio" (The Impact of Biointensive Cropping on Yields and Nutrient Contents of Collard Greens in Kenya) na Gĩgĩkũyũ na agĩcoka akĩũtaũra na Gĩthũngũ. Mandĩko macio merĩ, ma Gĩgĩkũyũ na ma Gĩthũngũ, nĩ amaneire arutani a Thukuru ya Ngathĩ cia Igũrũ (Thukuru ya Ngiranjuĩti) ya Yunibacĩtĩ ya Cornell mwaka wa 2003, kũhingia gĩcunjĩ kĩa mabatarania ma ngathĩ ya Mũramati wa Thayathi.

Hamwe na kwandĩka na Gĩgĩkũyũ, Gatua wa Mbũgwa nĩ arutĩte thani igĩrĩ cia marebeta ma gĩthomo na ndũrũhĩ, Maitũ nĩ Ma Iitũ (1999), na Maitũ nĩ Ma Itũ Kerĩ (2005).

No wandĩkĩre Gatua wa Mbũgwa marũa-ma-kũbucia ũmũhe mawoni maku.

Thaaai!

Google

Banner



Gwakwo: Mũgaa 21, 2001;     Kwerũhio: Muoria Nyoni 20, 2006;     © 2001-2007 Gatua wa Mbũgwa