KŨHANDŨRA HANDE

Nĩ kũrĩ mainagĩra o harĩa maruona
No gaka kagũnda nĩ ka magegania
Kagegagia mũgĩ agatuĩka kĩrimũ
Kaagegia kĩrimũ gĩkahandũra hande

Wakinya kagũnda harĩa ũinagĩra
Rwĩmbo rwa mahanda ũkĩhanda mbegũ
Rangĩra kagũnda gatigateremwo
Tondũ kwĩ mĩrĩmũ ĩrahandũra hande

Ũtahingũrĩire mũhandi wa mbegũ
Aine rwa mahanda rĩrĩa mwĩ kagũnda
Menyaga kagũnda ti ga gũteremwo
Karĩa gatereme tiganaga na ko

Rwĩmbo rwa mahanda nĩ ruo rwa kĩguni
Na rĩrĩa wĩ mũrĩu wahandũra mbegũ
Gũtirĩ makoima na nja magũteithie
Na mangĩhanda mbegũ ti we ũkamĩgetha

No angĩ ndĩraigua rĩu matiinaga
Tondũ marĩ bara metanaga wa ikũmi
Manyua kari kari moigaga no ikũmi
Na ko kagũnda kao gakarĩmwo nĩ angĩ

Tondũ na guo mũrĩo nĩ wĩrĩyagĩra
Manyua kari kari mahanaga kũgonio
Makariganĩrwo nĩ ahandi a mbegũ
Na mbegũ ĩrĩ hande nĩ yaramagia mũciĩ

Ndĩraigua mainũka makomaga rungu
Marotage kari kari atĩ no gakũmi
Na ciana ciaciarwo ciagage mũtũkia
Nĩ ũndũ kagũnda kao nĩ gaateremirwo

Gũtirĩ kwao kwega o na marĩ rungu
Mĩrimũ ĩramakora o kũrĩa makoma
Kagũnda kendaga mũrangĩri mwega
Na mũthigari ũrĩ rungu ti mũrangĩri

Kau kari kari ugaaga no ikũmi
Nĩ ko kagiragia ũmenyage ũkiuma nja
Na kwĩ na mĩrĩmũ ĩtarĩ na kĩhonia
Coka mũciĩ ũrĩmĩre mbegũ wahandire

Rĩu ndagũthaitha inũka ũgaake mũciĩ
Na wĩhandĩre mbegũ kagũndainĩ gaku
Tondũ gwaka mũciĩ nĩ gwaka bũrũri
Na bũrũri ũyũ witũ no mũhaka twake

Gwitũ gũkuĩte anyui manyanya mana
Gathũngũri kanyu nĩ makenda ikũmi
Na ko karĩmo kaarĩa nĩ makũmi atano
Kaĩ mũkamĩtiga twaga a gũtara

Na rĩrĩa mũrakua angĩ no gwĩtongia
Moigaga ngĩa gũtirĩ munju ĩtangĩenderio
Maĩ ma makongo kana gatumumia
Bata wao nĩ mbia matirĩ tha na inyuĩ

Kĩa mũndũ gĩakinya gũkua no nginya akue
No gĩkĩ gĩa kari kari nĩ gũkinyithio
Nĩ ũndũ wa mũrimũ wĩtagwo mwĩmeno
Wĩraga mũndũ emene akanyua kari kari

Kau kari kari tiganai na ko
O na ge ga ikũmi tiganai na ko
Tondũ mũkĩita thĩ na kau ga ikũmi
Na cio ciana mĩciĩinĩ iratharana noe

Nĩ kũrĩ mainagĩra o harĩa maruona
No gaka kagũnda nĩ ka magegania
Kagegagia mũgĩ agatuĩka kĩrimũ
Kaagegia kĩrimũ gĩkahandũra hande

© Gacicia 2005 Gatua wa Mbũgwa