MWĨMENO

Mwĩmeno nĩ mũrimũ mũru
Ũtũmaga mũndũ endie ũrigithathi
Watharĩkĩire itũũra rĩa gwitũ
Marigithathi magĩtuĩka marigithie

Mwĩmeno nĩ mũrimũ mũru
Ũtũmaga mũndũ emene
Warwarire mũthaka nyakairũ
Agĩtuĩka ndũti mwĩgerekania

Mwĩmeno nĩ mũrimũ mũru
Ũtũmaga mũndũ eyanange
Waguthũkĩire rendi kĩrorerwa
Ĩgĩĩkũrũta ũirũ na ndawa

Mwĩmeno nĩ mũrimũ mũru
Wonagia mũndũ mĩago ya kwĩyananga
Wanyitire mwanake wa gwitũ
Akĩendia ng’ũndũ akanyue gacohi

Mwĩmeno nĩ mũrimũ mũru
Ũthomoraga mũthomu
Warwarirwo ni mũthomu wa itũũra
Agĩte gĩkũyũ akagũre gĩthũngũ

Mwĩmeno nĩ mũrimũ mũru
Ũharaganagia matũũra
Warwarire itũũra rĩa gwitũ
Rĩgĩtiga kũrĩma rĩkaare rũhĩ

Mwĩmeno nĩ mũrimũ mũru
Mũthuri egũceera kwa mũriũ Gĩcuka
Aaheo gataurũ ga kwĩhura nĩ mũruti wĩra
Mũka wa mũriũ akiuga kahurage iratũ

Mwĩmeno nĩ mũrimũ mũru
Mwanake ekwĩra mũirĩtu akĩmuha
Ngwĩthũa gĩthũngũ ngamira gĩthũngũ
Na twagũrana tũrĩbogothaga gĩthũngũ

Mwĩmeno nĩ mũrimũ mũru
Na tondũ mwemena ũguo
Mwakumia nĩmĩ cia ageni gwĩ cianyu
Cianyu no cio ikaingata ũtũũrũa mũciĩ

© Mũgiranjara 2005 Gatua wa Mbũgwa